ბათუმი ის ქალაქია, რომელიც იოლად აყვარებს სტუმარს თავს. არის რაღაც განუმეორებელი ხიბლი ამ პატარა, თეთრ, უმეტესწილად 2-3 სართულიანი შენობებით ნაგებ ქალაქში. ქალაქის ის ნაწილი, რომელსაც ბათუმელები ,,ძველ ბათუმს" ეძახიან, დაახლოებით 150 წლისაა. ძველ ბათუმში ერთმანეთის მიყოლებითაა ჩამწკრივებული ჯეზვეს საამქრო, სადაც სპილენძის მესაიდუმლენი ყავის მოსადუღებელ ამ უნიკალურ ჭურჭელს აკეთებენ და ყავის წისქვილი, რომლიდან გამოსული არაჩვეულებრივი სუნიც მთელს უბანში დგას. ამ არომატს ჯადოსნური ძალა აქვს - მას უნებურად კარგ ხასიათზე მოჰყავს გამვლელი. საერთოდ ყავის სმის რიტუალს დიდი ადგილი უჭირავს ბათუმურ ცხოვრებაში. აქ ძალიან ბევრი ღია კაფეა სადაც ქალაქის მკვიდრნი ასაკისა და ინტერესების მიხედვით იკრიბებიან და გაცხელებულ ქვიშაზე მოდუღებულ, არომატულ, ქაფქაფა შავ ყავას სვამენ. თუმცა არის ერთი ადგილი, სადაც გაზაფხულზე, 
ზაფხულსა და შემოდგომაზე, საღამოობით, თითქმის მთელი ქალაქი იკრიბება ყავის დასალევად - ეს ბათუმის სანაპიროა. სანაპიროსთან ბათუმელებს კიდევ ერთი ტრადიცია აკავშირებს: სამგზავრო ნავმისადგომზე წელიწადის ყველა დროს შეგიძლ.
იათ ნახოთ მოთევზავე ბათუმელები. აქ თავს იყრიან ყველა ასაკის ადამიანები. ისინი მრავალგვარი თევზსაჭერი ხელსაწყოთი არიან აღჭურვილები: აქ ნახავთ ყველაფერს ძვირადღირებული სპინინგით დაწყებული და თვითნაკეთი ანკესით დამთავრებული. სანაპიროზე თევზჭერის ტრადიცია ბათუმელთათვის მთელი ფილოსოფიაა, რომელთან ზიარებაც ქალაქის ყველა სტუმარს შეუძლია.
ძველი ბათუმის შენობები განუმეორებელი სილამაზისაა. აქ ბევრი ნაგებობიდან გიმზერენ ქიმერები და უსახელო მითიური არსებები, ლომები და ბათუმელების განსაკუთრებული სიამაყე - ბიჭუნა სალამურით. ბათუმის ზღვისპირა პარკთან ახლოს ლამაზი თეთრი შენობა ტიტანებს შემოუდგამთ მხრებზე და საუკუნეზე მეტია უდრტვინველად უჭირავთ თავიანთ ,,მძიმე" ტვირთი. ბათუმის თვალწარმტაც შენობათაგან ერთ-ერთია ფოსტის შენობა. ის XX საუკუნის დასაწყისშია აგებული და ორი ცენტრალური ქუჩის - ბარათაშვილისა და აბაშიძის ქუჩების კვეთაში დგას. მის გუმბათზე დამაგრებული საათი ქალაქის მთავარი საათია, რომლის მიხედვითაც ბათუმელები დროის სიზუსტეს ამოწმებენ.
ბათუმის თავისებურება ისეთი დეტალებისაგანაც შედგება, რომლებიც მხოლოდ დაკვირვებული თვალისთვისაა შესამჩნევი, მაგალითად, ცოტამ თუ იცის, რომ ბათუმში, მთელი დანარჩენი საქართველოსაგან განსხვავებით ფანჯრები გარეთ იღება, ან რომ საქართველოს ქალაქთაგან მხოლოდ ბათუმის ქუჩებშია სანიაღვრე არხებზე სპეციალური გადასასვლელები.
ყველაზე თავბრუდამხვევი ბათუმი მაგნოლიების ყვავილობისასაა. ამ პატარა თეთრ ქალაქში უამრავი მაგნოლიის ხეა. მათი ყვავილობისას ქალაქი გამაბრუებელ არომატში ეხვევა, მაგნოლიის ფოთლების ხასხასა სიმწვანეზე გედივითაა შემომჯდარი თეთრი ყვავილი, რომლის სურნელიც განსაკუთრებული იდუმალებით ავსებს ბათუმურ ღამეს.
